大大鑊

昨晚見隻腳仲未好, 食左一粒西醫俾的消炎藥, 結果出事~又係藥物敏感!!!
9點鐘食藥, 到11點左右隻眼好痕, 不停流鼻水, 經驗話俾我知又出事了!!
雖然藥物敏感唔係第一次, 不過每次都會好辛苦(比病更辛苦), 而且我知仲有幾個鐘挨!
隻眼好快就腫哂, 及至成塊面都脹起, 腫到甚至乎掙唔開隻眼睛, 睇唔到野! (變左鹹蛋超人咁!)
腫的地方又痕又"火慶", 好似想爆開的感覺, 要不停用冰敷眼, 不停飲水!
同佢爭鬥到三四點, 藥力終於散了, 程況好轉了. 雖然仲係好腫, 但己經唔痕唔痛, 終於可以睡一會!
朝早起身, 依然好腫, 又要請一日病假呢!

要入廠嗎?

個膝頭仲係好腫, 唔知係咪今日返工行得多呢! 應承左老豆聽朝仲係咁先去醫院險查. 佢講到好似好嚴重咁tim!
我話聽日會冇事, 佢話一定有事. 好似同佢玩大細咁!

唉~! 依排仲鬼咁多野做tim架?!

請大家代禱!

恩典

只要細心留意, 就會發現原來每天都不斷經歷神的恩典!

感謝主, 祖母的病情況轉好, 也因為這件事而令到我同家人的關係close左, 更加提醒自己要珍惜身邊的每一個人, 特別係自己的家人, 要把握時間讓他們認識基督.

感謝主, 樹團的camp, 再次讓我尋找到自己的價值同位置, 原來自己唔係咁差. 好多野都好得!
要懂得欣賞神的創造, 包括自己! 每個人一定有佢的恩賜~我願繼續做一條橋!

感謝主, 同蕭姑的分享, 啟發自己想到咩野先係成功! 人生的目標~過著榮耀神的生活!

感謝主, 讓我可以察覺身邊的人的需要, 讓我有關心人的心, 曾經埋怨身邊朋友冇主動關心自己, 現在發覺原來自己可以主動也是一種福氣! 習慣每晚為著身邊的人禱告!

感謝主, 讓我有帶人信主的機會. 星期日陪左籃球隊中一位未信的朋友返祟拜, 其實同佢好唔熟, 說真的我真係一個好怕同勿生人接觸的人. 完左崇拜之後我同佢傾左好耐, 雖然佢仍然唔係好信, 不過都會嘗試繼續返, 繼續尋求神!

感謝主, 無端端傷左隻腳, 但係可以換來一日的休息, 同親近神的機會.

不過蕭姑講得對呢, 係邊度跌倒就要係邊度爬返起身! 明白, 始終要再面對! 不過我相信靠著神總有一天會得勝!

舊患

今晚同團友打壁球乒乓波好開心.
最開心就係玩超級無敵乒乓波, 真係好攪笑!
玩接字遊戲, E先生講: 「123」跟住R先生講:「345」 之後小強好有信心地講:「678」~~輸左!!!

打完波發現自己左腳膝蓋屈唔到, 腫左一倍!! 其實頭先明明懶洋洋咁打, 有波都唔追, 汗都唔出一滴, 之後玩超級無敵乒乓波更加唔駛點動! 咁都出事?!! 雖然唔痛, 不過都有D擔心, 應該又係舊患! 因為以前打籃球時傷過, 膝蓋勞損有D骨質增生(醫生話冇得醫呀!), 每次劇烈運動後其實都會少少痛同有D腫. 今次雖然唔痛, 不過腫得特別勁. 唔知會唔會係我今年開始打返籃球所致呢？
唉......又唔打得嗎?!

原來超級無敵乒乓波都係一個幾危險的運動黎呢! :P

你睇唔睇到?

前日開始入唔到去睇自己同人地o既Blog, 原本以為blogger個server有問題, 不過發現其他人又入到去睇, 只係得我同阿基入唔到. 最後發現原來係用香港寬頻上網的都睇唔到!!!

點解會咁ga??? ><

祖母出院了

祖母出院了, 雖然仲未做手術, 要排期排到成11月, 但係現時的情況好好呢! 感謝主!
請繼續為佢信主代禱!

與傷心的人一同悲傷

弟兄有事, 雖然唔知咩, 文字間完全感受到他的傷痛.
無論咩野事都好, 我都會撐你的!!
神時刻都在你身邊!
為你禱告!

樹仁團契畢業生營(一)

一直期待已久的畢業生營終於完了!

第一晚入唔到CAMP真係有d可惜. 少左同阿輝、阿靖傾計的機會呢!

第二朝一早Anderson就打電話黎叫醒我去camp果邊的教會返祟拜. 不過太累了, 最後決定睡多一陣, 在自己教會返完祟拜先入去.

完左祟拜即刻趕入去! 原本仲想入去同大家食午餐, 點知班弟兄真係太餓了, 餓波好耐!!! 飯都唔食就走去踢波. 我當然都係其中一個啦! haha! 如果唔係基舜用心良苦地踢左個波落山, 我想真係要班姊妹黎收波先可以去下個program呢! :p

下午的program係競技遊戲, 真係好好玩呀! 好開心呢, 好耐都冇試過玩咁多集體遊戲呢! 原本我係負責帶的, 結果都有得玩埋一份, 真係好! 估唔到大家出左黎做野咁耐都係一d都冇變呢, 一樣係咁傻!

晚上二十人逼埋係一間房打邊爐, 好食, 但好熱......唔夠冷氣!

樹仁團契畢業生營(二)

晚飯後係一個分享會, 分享大家現在面對的困難. 個分享會真係好正呀!!! 以前都好少試過二十人一齊分享, 因為通常都會分組先. 原本以為大圍分享大家都唔會分享得咁深入, 不過這晚大家都分享得好真好深呢! 當有人分享完困難, 大家又會用詩歌, 聖經及動作等不同的方法回應, 互相支持, 互相安慰, 感覺真係好warm! 最後熄燈拿著螢光棒唱"這個家"及"We are one big happy family!"真係好感動呢! 結果破哂記錄, 個program去到兩點幾先完!!

不過覺得自己好似變得越來越唔識得分享自己. 雖然回應他人的分享, 安慰鼓勵人都冇乜問題. 但是一到自己分享就唔識得點講, 講完自己都唔係好明自己講咩...... ><

最後一日朝早, 大家都訓到成十一點先食早餐, 結果原本的清晨敬拜變左中午敬拜呢! :p 好鍾意同樹仁團契的弟兄姊妹一齊唱詩歌, 一齊敬拜呢! 每次大家都會唱得好投入, 看到大家從心發出的笑容, 真係好正!! 一個充滿感恩, 充滿喜樂的敬拜!

抽中阿筠的代禱事項, 除左佢寫果d我會幫佢加多一項, 就係希望阿年生性d啦! 不過唔知依樣野算唔算係妄求呢??? haha!

要走了......真係好唔捨得大家呀! 一班唔同年份畢業的人, 畢左業仍然可以咁多人聚埋一齊去camp真係十分難得呢! 入得一晚真係好唔夠呀! 未同好多人傾計呀! ><

感謝主賜給我們這個camp, 讓我們再次從弟兄姊妹的身上經歷你的大愛, 重新得力, 繼續走往後的路程!

婚禮

第二次做人兄弟, 不過都係乜都唔識, 佈置架新娘車都攪左好耐.
接新娘都算無驚無險, 個邊的姊妹都幾留手呢~ 好彩!
整個婚禮都好順利! 成個團契一齊去飲真係好熱鬧呀!

祝有&嘉麗: 百年好合, 永結同心, 主恩常在!

祖母入院

祖母今早入院, 心臟有事. 現在情況穩定.
爸爸媽媽去左旅行要星期五晚先返.
我同姐姐暫時決定唔通知他們, 免得他們太擔心.
不過好大壓力, 千其唔好有事.
求主保守祖母平安無事. 早日出院.

請為此代禱! 謝謝!

得勝之歌

昨晚同團友一齊去聽"得勝之歌"音樂會, 真係好好聽呀! 估唔到我地的詩班都可以咁pro! 詩歌的歌詞同程序都好有意思呢, 聽完都幾有得著. 不過由於隻腳有舊患, 唔屈得太耐, 座得都幾辛苦!><

有兩首歌最令我感動呢!

兒女何等有福
在壓力中仍能平靜，在忙碌中仍能悠閒，
在失敗中仍能歡笑，在逼迫中仍能屹立,
上帝的兒女何等有福。有福，有福，上帝的兒女何等有福。
在絕望中仍有盼望，在冷漠中仍有關懷，
在困境中仍有出路，在死亡中仍有生命，
上帝的兒女何等有福。有福，有福，上帝的兒女何等有福。

「然而，靠著愛我們的主，在這一切的事上已經得勝有餘了。因為我深信無論是死、是生，是天使、是掌權的，是有能的，是現在的事、是將來的事，是高處的、是低處的，是別的受造之物，都不能叫我們與神的愛隔絕；這愛是在我們的主基督耶穌裡的。」（羅8:37-39）

我將生命交給上帝
我將生命交給上帝，患難不能將我嚇倒，
我把生死置諸度外，逆境不能令我下淚。
帶著微笑，昂首闊步，走著上帝要我走的路。

感謝主！上帝的兒女何等有福！

同路人

1.念那天起步 懷內滿掙扎
　誰料覓真理 路遠又險窄
　越過眾山嶺 還望你鞭策
　迷途我驚慌 盼為我導引
2.自你同上路 懷內滿興奮
　同實現真理 路遠能呼應
　俗世多圈套 常望你督責
　求為我祝福 努力不後退
副歌：
　碰到挫折我掛慮 肩擔重壓我困累
　一生幾多試與煉 你為我祈禱
　見到快慰開心事 但願樣樣你分嚐
　為你感謝神 同路極珍貴

Bb轉Eb的歌, 一次都未練過就要即時彈, 真係有d難度! 仲要係咁多人面前~壓力好大呢! 其實彈得幾差, 希望冇咩人聽得出啦! (><;)

分組時聽到蕭姑的分享, 真係想同佢講聲對唔住呢!

籃球場上

上過星期因為返工好累冇去練波, 隔左一過星期再去, 今日反而打得幾好, 仲入左好多波tim!
走果陣隊友仲問我係咪自己返去練過?! mumm....玩滑浪唔知算唔算練過下體能呀?! Haha~可能平時打得太差吧, 今日打好少少大家就好出奇呢! :p
其實現在比我中學時真係差好遠, 記得果時真係任何的遠射甚至三分球有空位時命中率真係高達70%, 現在......10%都冇. 今日入果d都係係籃底或者係快攻走籃呢!
咁多年冇打, 技術差左, 信心更差! 現在接到個波後, 只會想著交俾人, 有空位都冇信心射波, 因為覺得一定唔會入.
今日總算有進步.

原來"冇自信"也可到籃球場上看到!

這個家

好開心, 昨晚終於邀請到B弟兄跟我返團契. 記得認識他當時還是未信的, 之後看到他信主, 到現在看到他第一次返團契, 心裡真是感恩非常! 希望他可以在團契中得到支持, 在信仰上不斷成長!

週會中, 聽到R弟兄在領詩的分享, 真係好大感觸呢! 其實我自己也試過多次唔想返團契, 甚至轉過好多間教會呢! 我想也許我明白他們的感受吧! 雖然現在我冇咩可以幫手, 唯一就是為他們禱告, 相信神一定會尋找他們回來!

下面係我一首好鍾意的詩歌, 願團契都能像這個家一樣!

這個家
願你帶著歡笑走進這個家
互勉帶著基督愛心
共探討天父真理同明瞭神話語
走每一步能緊守主旨意
多分享主愛彼此擔憂慮
願主帶領我路程不畏懼
效法主關心與扶助齊學習兼實踐
願愛主事奉竭力在這家裡

工作: 盡力做好自己的責任, 減少與同事比較.
家庭: 改變自己為的態度, 做好見證.
與人相處: 坦誠, 主動開放.
愛情: 耐心等候, 祈求.
金錢: 十分一奉獻.

遊船河

今日去左同事攪的游船河, 都幾好玩, 不過差d遇溺! :p
其實我係唔識得游水的, 原本都冇諗住落水, 不過見大家游得咁開心, 係船上面又冇乜野做, 就落左水游一下. 開頭游左去好近船邊的水抱, 都ok喎! 之後浮遠左少少, 諗住放開個水抱游返上船, 點知就差d出事!! 原本以為好近, 但係又游極都游唔到返去, 個人越急就越亂, 越來越唔夠氣, 當時都真係幾驚, 不過最後好辛苦咁都挨到返去! 諗返都幾恐怖!

之後又去左玩滑水, 試左四次都唔成功! 其實我都算幾好架啦, 企倒起身, 轉埋塊板, 就係之後唔記得重心要向後, 結果就失左平衡, 跌左落水! 相信只要俾我試多一兩次, 就一定得呢!