恐怖的Quarter End

連續返工兩個星期都冇假放, 一連三晚加班到半晚十二點幾, 連午餐晚餐都冇時間食!
累死人呀!

其實辛苦都唔算太慘, 由於依兩個月都有同事走, 越來越多野要take up, 開始有d應付不來. 今次month end做錯好多野, 同事都有點埋怨. 不過自己更加唔開心, 覺得自己都真係太唔小心了! 壓力好大呀~! 過埋下個月個同事走左仲死! 唉~!其實真係唔熟佢d野~點take up呀!

唔想了! 今日總算可以準時d走呢~要好好"目訓"番晚先!

感動

同事要走, 要take up好多野, 好亂, 做錯好多野, 壓力好大呀!! 生日就係咁度過了!

整天收到好多朋友祝福的SMS同電話, 多謝呀! 多謝大家咁重視我呀! 但係由於係公司傾計唔係咁方面, 好似唔係好講倒野咁, sorry呀! 不過其實我真係好開心o架!

放工返到屋企成點幾鐘, 媽咪竟然咁夜起身俾封利是我, 祝我生日快樂, 仲留左一個生日蛋糕俾我! 佢見我好累, 就話算了唔好食了早d訓啦, 就返左入房了! 我原本都唔餓, 不過我都去雪櫃拿左個蛋糕出黎食.



好好食呀.....好感動......哭了......多謝爸爸媽媽......

生日

剛剛先放工返到屋企, 明天還要繼續OT呢, 已經連續兩年在公司過生日了!

不過又冇乜唔開心, 唔知呢? 上年一個好唔開心的生日後, 好似已經對生日冇乜感覺. 冇乜特別, 日子又係咁過. 冇想過點慶祝, 其實都應該都唔會慶祝. 反而好似慶祝朋友生日仲開心!

點都好啦! 係度只有自己同自己講句 "生日快樂!"

敬拜

週會題目係敬拜, 請左友堂的敬拜隊來到我地團契帶敬拜, 分享咩野係敬拜.

佢地帶的敬拜同樹團或潮浸果種模式冇咩分別, 不過我地以琳團契就好似冇乜依種敬拜呢! 通常週會都只有詩歌分享.

其實我之前都想過係團契攪下詩歌敬拜, 今次正合我意呀!

敬拜感覺好好, 同神好親近!
當中腦海浮現幾個畫面, 都係以前樹團事奉的片段.
另外又浮現出某年樹團O'Camp長洲某camp site禮堂中的十字架?? (唔知點解?)
總括來講發覺自己活得最有意義的時候, 就是事奉神的時候!
真係好想再次全心投入去事奉.
但係事奉方向係咩? 關顧嗎? 小組嗎? 結他嗎? 籃球嗎? 足球嗎?

我可以嗎?

最後蕭姑叫我地想想情緒低潮等唔等於靈命低潮?
我想情緒低落雖然不等於靈命差, 但係多多少少都會有所影響. 相反靈命差就未必係情緒低落. 因為我現在情緒冇乜野, 但就進入靈命低潮了.

唔得, 我要再次振作, 要復興! 為我禱告吧!

用愛做世界

每逢假期返工, 同事們都會習慣開大收音機, 一路聽一路做. 今日又聽到這個基督教的節目了, 叫做"用愛做世界"呢! 其實都聽過好多次, 但次次都唔記得個節目叫咩名, 今日終於記得了!

雖然其實我都唔係好清楚依個節目詳細的內容講d咩(我好專心地工作ga ma!), 不過我聽到主持人好多時都會講一d鼓勵的說話, 分享自己的經歷, 帶出好多正面的信息, 又會叫人祈禱同依靠神. 而且當中播放的全部都係詩歌, 令人有好舒服的感覺!

雖然我的同事全都唔係基督徒, 不過都好似好接受依個節目呢! 又冇轉台, 又冇話d詩歌難聽o咼! (因為平時佢地一聽到d悶野就立即轉台ga!)

其實收音機廣播真係一個幾好的福音媒介, 相比電視好好多呀! 有時基督教電視台真係幾悶, 莫講唔係基督徙, 就連我自己睇都唔想睇呢! 相反我覺得收音機廣播感覺好親切, 好似聽朋友分享一樣! 好正!

願這節目能讓更多的人信主!